Konmemora Dia di Derechi Humano. 10 di desèmber ta e fecha ku Estados Uní a aseptá i proklamá e Deklarashon Universal di Derechi Humano. E dokumento aki ta esun mas tradusí na mundu i ta disponibel den mas ku 500 idioma. Tambe e ta e inspirashon di kua hopi konvenio di derechi humano a sali i ku 73 aña despues gobièrnunan, organisashonnan i suidadanonan rònt mundu ta para ketu pa reflehá riba e importansia, promoshon i protekshon di derechi humano.
Human Rights Defense Curaçao (HRDC) ta kontentu di por selebrá su di 2 lustro riba e bunita fecha di 10 di desèmber. Den e último dos añanan, HRDC a logra di haña su mes lugá den e sosiedat di Kòrsou komo organisashon, pero tambe a wòrdu rekonosé riba nivel internashonal. E tema di Dia di Derechi Humano 2021 ta: “Equality – Reducing Inequalities, Advancing Human Rights”. Basá riba Artikulo 1 di e Deklarashon Universal di Derechi Humano: “Tur hende ta nase liber i ku mesun diginidat i derechi.”
Esaki ta presis kiko HRDC ta representá: Igualdat den dignidat i derechi di tur hende, den oportunidatnan i resultadonan pa un sosiedat mas hustu i inklusivo. Esaki ta inkluí duna atenshon na i buska solushon pa formanan di diskriminashon ku ta afektá esnan mas vulnerabel den nos país: mucha i hóben, e ansiano soltero, refugiadonan i migrantenan den krisis
E krisis di COVID a trese konsekuensia signifikante pa nos sosiedat i HRDC a keda brinda e yudansa nesesario pa migrantenan den krisis. Kosnan no a kambia muchu den e situashon di e personanan aki. Ounke ku tin hopi di nan ku tin entre 5 pa 7 aña ta biba aki, ainda nan ta sofoká bou di e miedu di deportashon. Pa nan HRDC atrobe ta hasi un yamada na nos outoridatnan pa nos sigui traha pa yega na un forma di integrashon real.
Pareu ku esaki, HRDC komo un NGO ta keda habrí pa defendé derechi humano di tur suidadano di Kòrsou. Yudando pa eduká i konsientisá tur hende di kiko nan derechinan ta. Spesialmente esnan politiko i sivil, pero tambe derechinan social, ekonómiko i kultural.
HRDC ta deseá tur hende di Kòrsou un digno Dia di Derechi Humano ku reflekshon riba e rèspèt pa e derechi humano fundamental di nos tur.