En prinsipio, ta komprensibel ku e Ordenanza Nasional aki ta nesesario den situasion determiná di krisis y emergensia. Sin embargo, e konvershon di e forma i kontenido den un gran arreglo general, estilo “one size fits all”, no ta sirbi. Ku otro palabra: mester konsiderá seriamente pa formulá diferente lei adekuá pa sirbi den diferente situashon di krisis, manera desaster natural, pandemia, terorismo, etseera, ku kada un ta meresé muchu mas ku un trato igual.
Komo NGO dediká na defensa di derecho humano, Human Rights Defense Curaçao ta mas vigilante ora ta trata di akontesimento den nos komunidat ku por sea afektá o violá derecho humano vital di residentenan di Kòrsou.
Manera e debate públiko a lanta kabes den fin di siman, un kantidat di siudadano i diferente miembro di media di komunisashon a aserká nos pa tende nos opinion. Por sierto Human Rights Defense Curaçao ta masha kontentu ku nos ta persibí un kresementu di e importansia ku lokalmente ta duna na derecho humano.
Human Rights Defense Curaçao ta kompartí e preokupashon ku ta eksistí pa e peligernan potensial ku ta persistí den e teksto aktual pa ku nos derechonan humano fundamental manera libertat di ekspreshon, libertat di manifestashon i e derecho riba privasidat den bo mes kas.
Además e garantianan aktual no ta ofresé protekshon adekuá. Basá riba ekspertisio di outoridatnan riba tereno di derecho konstitusional, i na nos opinion, mester introdusí ahuste práktiko (i pagabel) pa aselerá akseso na hustisia (nos huesnan). E lei aki meter ta keda keda aproba ku riba un mayoría kualifiká (2/3 parti) en bes di un mayoria simpel.
Komo Human Rights Defense Curaçao nos sospechá ku e garantía final di gobièrnu di Reino pa salvaguardiá nos derechonan humano ta nada mas ku un iliushon. Te aworaki gobièrnu na Den Haag a distanshá for di tur asuntu ku ta toka derecho humano lokal i ta preferá pa designá nan komo “kompetensia outónomo” di e otro paisnan den reino.
Mayoria di siuadano lo ta di akuerdo ku nos, ku tin ku evitá ku ta pone nos estado di derecho bou di preshon. Mester evitá abusu di poder, desishon arbitral i represaya na un manera vigoroso. Rònt mundu tin multiple ehèmpel di kon siudadano inosente, medionan di komunikashon no deseá i miembro di NGO ta bira víktimá di “estado di emergensia”.
Human Rights Defense Curaçao ta apoyá tur esnan ku ke hasi un yamamentu urgente pa gobièrnu di Kòrsou respondé ku mas disposishon i atenshon na e preokupashon legítimo ku ta biba de nos komunidat pa loke ta derecho humano. Nos gobièrnu tin e deber pa traha na garantisá nos derechonan humano na un manera óptimo posibel.
Human Rights Defense Curaçao Kòrsou, 25 di novèmber 2020