Human Rights Defense Curaçao (HRDC) ta komprometé su mes na protekshon di derechonan humano pa tur habitantenan di Kòrsou, inkluyendo refugiadonan i migrantenan den krísis.
Ainda tin personanan, muhé i hòmber, pa basta tempu será den baraknan di estranhero. E tempunan ta varia for di simannan, lunanan te ku mas ku 1 aña. Esaki den sirkunstansianan hopi primitivo. Den e barakanan e situashon ta hopi tenso i tristu, ku mayoria biaha tiki òf nada di hasi. P’esei Kabes di e baraknan di Sentro di Detenshon i Korekshon Kòrsou (SDKK) a aserká Human Rights Defense Curaçao ku e petishon pa por yuda ku materialnan di rekreashon pa medio ku nan tin skarsedat di rekurso. HRDC ku ta e fundashon pa derechonan humano a pidi i haña yudansa finansiero di Vertegenwoordiging van Nederland in Willemstad (VNW) na nòmber di Ministerie van Binnenlandse Zaken en Koninkrijksrelaties. E yudansa ta bini for di Klein Projecten Fonds. Ku e fondonan aki VNW kier kontribuí i promové na bienestar di pueblo di Aruba, Kòrsou i Sint Maarten.
Djamars 2 di Mart 2021 e delegadonan di VNW i HRDC a entregá un set di materialnan pa rekreashon i deporte i instrumentonan di músika, na e Kabes di baraknan di estranhero. Ku hopi entusiasmo e opsekionan a keda risibí. HRDC ta spera ku e gesto aki por trese un tiki alivio.
E personanan den e baraknan, tin ya hopi aña ta biba i traha na Kòrsou den por ehèmpel sektornan di kuido, horeca òf den kuido di yu. Ta importante pa HRDC por mira e efektonan positivo ku e refugiadonan i migrantenan den krísis ta kontribuí na nos Pais
Materialnan di rekreashon i deporte i instrumentonan di músika pa baraknan di estranhero. Drpd Sr. Pinedo, (Polis i SDKK), Sr. Bo Melchers (Nederlandse Vertegenwoordiging). Inchi Witteveen (Human Rights Defense Curaçao) i Sr. A Hasselmeijer Kabes di Barak.(SDKK)
Nota informativo di Human Rights Defense Curaçao:
E situashon ku ta konserní derechonan humano riba nos isla ta preokupante. Mester bini un maneho integral pa migrantenan i asilo. Sigur miéntras gobièrnu no a firma e tratado di refugiado di Nashonnan Uni. I ku Kòrsou no tin un maneho di refugiado ofisial. Komo miembro di Koninkrijk der Nederlanden, Kòrsou ta mará na e tratado Europeo di Derechonan Humano (EVRM). E tratado aki ta prohibí ku paisnan por saka i manda un persona na un Pais ku e ta kore un riesgo real di martirio òf inhumano , humiliashon òf kastigu (artíkulo 3)
Human Rights Curaçao (HRDC) ta komprometé su mes na protekshon di derechonan humano pa tur habitantenan di Kòrsou, inkluyendo refugiadonan i migrantenan den krísis. E organisashon lo keda dediká su mes na:
Amplia konosementu tokante derechonan humano Refugiadonan i migrantenan den krísis i nan derechonan. Nos ta informá i avisá tokante e derechonan. Señalá i referí si mester asistensia den kaso di nesesidat, asistensia hurídiko, asistensia sikososial, i fasilidatnan di enseñansa.
Dor di organisá aktividatnan, manera anochinan informativo ku interakshonnan sosial i edukashonal den bario (tur kos en konekshon ku Covid-19)
Tur esaki HRDC por hasi solamente ku koperashon di partnernan lokal, otro Non-Governmental Organizations (NGO’s) lokal i internashonal. Tambe dor di envolví gobièrnu i e públiko grandi di Kòrsou pa protekshon di derechonan humano di refugiadonan.