Promé di mei 2024, Presidente di Gerensia di Human Rights Defense Curaçao (HRDC), Sra. Lucita Moenir Alam, a pasa e batuta pa Camillo Bakhuis.
For di komienso di HRDC na 2019, Sra. Moenir Alam, a hasi un kontribushon balioso na desaroyo i kresementu di e organisashon. Tambe e a krea mas konosementu di derechi humano i su importansia pa un i tur.
Durante di un lunch di despedida ofresé pa HRDC, Sra. Moenir Alam a bisa ku no semper e trabou tabata mesun fásil. “Un organisashon no-gubernamental i independiente manera HRDC, no semper tin notisia agradabel pa anunsiá. Ora ta nesesario, tambe mester hasi denunsia i manifestá prekupashon na momento ku no respetá derechinan humano òf ora no ta kumpli ku esaki sufisientemente”. Segun Sra. Moenir Alam: “mester ta krítiko ora esaki ta nesesario”.
Bou di su guia, HRDC a hunga un papel importante den fortifikashon di nos sosiedat sívil. Sentral tabata semper e tema di migrashon, prinsipalmente asistensia hurídiko i humanitario na esnan indokumentá; lòbimentu pa un maneho di migrashon hustu, i tambe inklushon di migrantenan di bon boluntat den nos merkado laboral. E aktividatnan aki lo keda importante, manera tambe e kontinuashon di e selebrashon anual di Dia di Nashonnan Uní di Demokrasia, un kustumber di e último 3 añanan. Ademas, otro temanan urgente lo haña mas atenshon di HRDC den futuro, manera kambio di klima. Derechi riba un medio ambiente salú i duradero tambe ta parti di derechinan humano.
HRDC ta gradesí e presidente anterior prinsipalmente pa su kompromiso na un Kòrsou ku ta respetá derechinan humano, irespekto nashonalidat, género òf status soshal. HRDC ta mira dilanti riba un liderasgo nobo ku lo amplia i profundisá riba derechinan humano den konteksto di demokrasia.
Presidente Camillo Bakhuis, a dirigí su mes na e presentenan bisando ku e ta sinti su mes honrá di tuma e batuta di Sra. Moenir Alam. E ta akseptá e reto nobo rekonosiendo na mes momento ku Sra. Moenir Alam su influensia lo ta un guia den su trabou, pero tambe den kambio di prioridatnan di HRDC ku a keda akordá for di aña pasá. Sr. Camillo Bakhuis tin eksperiensia di sektor privá i semi-gubernamental. Na hopi okashon e a demostrá su kompromiso sosial ku diferente organisashon, entre nan, Fundashon Kòrsou Transparente.
HRDC ta kontentu di a haña e konfiansa di un hende altamente prepará pa duna guia komo presidente den e próksimo dos (2) añanan.
Willemstad, 2 mei 2024