TMedia
Akshon di siudania ta rekerí den lucha pa redusí e dañonan di e krísis di klima pa Kòrsou i su konsekuensia pa ekonomia i demokrasia
Den e oula kompletamente yen di University of Curaçao, Human Rights Defense Curacao (HRDC) a konmemorá Dia Internashonal di Demokrasia. E tema e biaha aki tabata kon e krísis di klima ta un menasa pa nos bida, nos sobrebibensia i kon esaki ta relatá ku nos demokrasia. Tantu e oradó prinsipal, Drs. Kathleen Ferrier, komo Dr. Mark Vermeij a enfatisá ku e krísis di klima ta un echo indiskutibel i ku Kòrsou urgentemente mester tuma akshon pa protehá e isla i tur forma di bida. A konkluí ku no tin boluntat polítiko sufisiente pa trese kambio, desaroyá maneho i invertí den mantenshon di lei i reglanan vigente. E ròl di e siudadano, e ‘demos’ den demokrasia, ta importante. Importante pasombra siudadania mester sòru pa polítikonan hasi kambio di klima un prioridat i tuma akshonnan konkreto.
Drs. Ferrier, un eksperto internashonal riba tereno di derechi humano i demokrasia, den su duskurso “Als het water aan de lippen staat” a bisa ku demokrasia ta mesun fuerte ku e kapasidat i vishon di e dirigentenan di nos demokrasia. No por sinta warda riba gobernantenan pa bin ku maneho i leinan relevante. E ta proponé pa pueblo ta mas envolbí riba e tema aki. E ta konsehá den kuadro di elekshon binidero, pa votadónan eksihí di partidonan polítiko pa delineá nan pensamentu i proposishonnan konkreto pa ku kambio di klima i husga nan promé ku vota pa nan. Tambe e ta kere ta nesesario pa hende organisá nan mes den organisashonnan sivil ku ta eksihí di dirigentenan pa demokrátikamente trese kambio. Den e kuadro aki e ta proponé entre otro un aserkamentu horizontal di koperashon entre organisashonnan no-gubernamental.
Dr. Vermeij, Direktor sientífiko di CARMABI den su diskurso “Take a swim before the island does” a mustra kon nos refnan kada biaha ta mas ménos resistente pa fungi komo lugá pa piská brui i tambe protehá nos kosta i habitantenan kontra wer ekstremo ku ta kada biaha mas frekuente pa motibu di kambio di klima. E a mustra tambe kon CTB ta bende Kòrsou komo paraiso riba i bou di laman miéntras ku si no para e destrukshon di nos refnan esaki ta peligrá turismo i sobrebibensia di miles di hende ku ta traha den e sektor. Tin lei vigente, pero aplikashon di esaki ta hopi defisiente, miéntras tampoko ta persiguí esnan ku kibra ku regla. E ta sinta falta di un sentido di urgensia, boluntat polítiko i tambe e medionan finansiero nesesario pa metigá e konsekuensianan di un krísis ku e ta konsiderá, irevokabel.
Presidente di HRDC, Drs. Camillo Bakhuis, tabata sumamente satisfecho ku e kantidat di hende ku a akudí na e evenementu ku apesar di ta asina importante pa nos tur, no ta risibi sufisiente atenshon den komunidat. Mas aleu e a pidi e públiko presente plama e informashon ku a bin dilanti di ámbos oradó.
Esaki ta di 4 biaha ku HRDC ta organisá un evenemento na okashon di Dia di Demokrasia. HRDC ta agredesido na e oradónan, kada un un eksperto riba su tereno, spònsernan, e ekipo di HRDC, i prinsipalmente tur e bishitantenan ku a hasi e evento posibel.