Asombrá Human Rights Defense Curaçao (HRDC) a tuma nota di e notisianan den medionan di komunikashon tokante e kontestanan di Sekretario di Estado Knops na e miembro di Tweede Kamer señora Antje Diertens.
Riba e preguntanan supstansial di e miembro di Tweede Kamer tokante e sirkunstansianan real di repatriashon di e refugiadonan venezolano i e migrantenan den krísis riba algun buelo na oktober i desèmber di 2020, señor Knops a brinda un deskripshon ku, lamentablemente ta reflehá parsialmente so e eksperensia- i echonan, manera ta konosí serka nos organisashon di derechonan humano.
Pa tal motibu HRDC ta sintié yamá pa duna algun komentario i sita ehèmpel di e trato ku te ainda segun normanan internashonal ta inaseptabel, esta e forma di trata venezolanonan ku a buska refugio na Kòrsou. E grupo vulnerabel akí no tin niun benefisio di mitar bèrdat i deskripshon polítikamente korekto di e situashon lamentabel den kua masha di nan ta haña nan, tantu den e kuartel di inmigrashon komo pafó di esaki.
Kontestanan manera esakinan ta duna un imágen trosí di e situashon manera e ta realmente. Hendenan ku ta buska nos yudansa ta haña nan ta enfrentá prosedimentunan kuestionabel i no transparente; ta nenga nos asistente legal entrada, e preshon sikológiko di argumentá konstantemente ku e prosedimentunan legal no tin sentido i ku e hendenan akí tin di keda den e baraknan pa hopi tempu, ta un parti importante di nan realidat. Den e konteksto akí, un grupo di hende desesperá bibando den un situashon ahigiéniko i sin perspektiva di por nifiká algu pa nan miembronan di famia ku a ked’atras na Venezuela, a ‘skohe’, anto no por bisa ku nan a skohe boluntariamente, pa deportá nan numa, pero e eskoho tabata hasí den nan desesperashon.
Algun ehèmpel práktiko:
Un gran kantidat di refugiado repatriá i migrantenan den krísis a solisitá asistensia legal via Human Rights Defense Curaçao. Anto a nenga Human Rights Defense Curaçao akseso na su klientenan den e baraknan di SDKK pa verifiká si nan kera bai nan pais bèk bèrdè òf si ta preshon tabata pone riba nan.
A hisa un mucha hòmber menor di edat pone riba avion, kontra tur e regulashonnan internashonal, sin un deklarashon skibí di su mayornan. El a indiká ku su trato aki tabatin asina un impakto sikológiko riba dje, ku e no por a keda mas.
Tambe tin e kuestion di dos muhé ku parse a bira víktima di abuso seksual di parti di miembronan di seguridat (bewaking). Miéntras e kasonan akí tabata bou di investigashon, e muhénan akí a laga deportá nan ‘boluntariamente’.
Den tal konteksto, e konklushon ku ta trata aki di un repatriashon boluntario ta laga un smak basta marga ked’atras.
Esakinan ta algun ehèmpel doloroso ku nos konosé den práktika. Huntu ku nos sosionan lokal i internashonal nos sa ku e situashon di hopi venezolano na nos isla ta sigui ta teribel i ku demasiado frekuensia ta karakterisá pa eksplotashon i senofobia (rechaso di strañero). Demasiado frekuente ta nenga nan oportunidat o perspektiva real.
HRDC ke enfatisá ademas – i no ta promé biaha nos ta hasi esaki – ku responsabilidat di rèspèt pa derechonan humano ta un asuntu di Reino. Ta notabel ku pesisamente Sekretario di Estado, kende ta mashá komprometí ku kooperashon den hopi área (inkluyendo esunnan kaminda Kòrsou ta outónomo) nèt e ta deskuidá kaminda ta trata derechonan humano. E ta sigui insistí ku Kòrsou mes ta responsabel i prinsipalmente ku ta trata aki di un asuntu interno. Esaki no ta den konsonansia ku ‘Statüt’. Nashonnan Uní tambe ta mustra repetidamente den informenan di derechonan humano ku ta eksistí un responsabilidat konhunto.
Ademas, un konsekuensia indeseabel di e desvio akí ta ku outoridatnan kompetente na Den Haag aparentemente ta adoptá e vershon di Ministerio di Hustisia di Kòrsou, loke ta karga e riesgo ku ta propagá kontestanan suphetivo i polítikamente korekto. Di e mes manera ku e Sekretario di Estado a kompromet’é ku e yudansa di suministrá alimento na e migrantenan indokumentá, asina tambe e mester desempeñá un papel den garantisá e stèndertnan mínimo pa trato humanitario di e grupo akí.
P’esei, HRDC ta bolbe argumentá ku e seramentu den barak, riba tereno di prizòn i semper bai ainda bou di kondishonnan degradante, mester kambia pa un mihó akohida pa e venezolanonan ku ta buska refugio akí.
HRDC ta dispuesto di kooperá ku tur hende ku ta deseá pa respetá e derechonan humano di e grupo di buena fe di venezolano na nos pais.
Na nòmber di Human Rights Defense Curaçao
Direktor
Ieteke Witteveen